махаббат, қызық мол жылдар

жоғарыда аталған шығарманы алғаш рет толығымен оқып шықтым. шынымды айтар болсам, осы кітапты оқығаннан кейін қазақша мәтін жазуға аса ынтығып тұрған жоқпын, себебі әр жазған сөйлемім балабақша баласының аузынан шыққан сөзге көбірек ұқсайды. бірақ, жазбайын десем тағы болмайды, себебі бұл туынды менің жүрегімнен ерекше орынды иеленді, көңілімді тебірентті, көзіме жас алғызды. Меңтай мен Ербол адамгершілік жайындағы ойымды түбегейлі өзгертті. өздерінің пәк, адал махаббаттарымен, шынайы көңілдерімен менің жүрегімді жаулап, есіл-дертімді аудартып алды. адам баласының бойында қандай асыл қасиеттер болу керектігін бүгін тағы бір есіме түсіріп, жазушының соны оқырманға әдемі әрі орынды жеткізу шеберлігіне тәнті болдым. ондай бағалы қасиеттердің қатарына шыншылдық, ақпейілділік, ұстамдылық, үлкенге құрмет, ылғи жақсыны көруге тырысу, өзгелерді сынамау, адалдық жатады. шіркін, бір күні мен де осындай жақсы мінездерге ие болып, мақтанышпен жерді басып жүретін боламын! қазір өзімді мақтан етпейтін дегенім емес, мен әр минутты аса бағалаймын және өзімді дамыту үшін барымша күш салып жүрмін. тек алдағы уақытта өзімнің қазіргі еңбегімнің жемісін көріп, масаттанып жүретін боламын деп айтқым келді.

махаббат расында да теңдесі жоқ керемет сезім. олсыз өмір сүруге болады десе де бұл мүмкін емес. әр адамға ылғи жанынан табылатын, көз жасын сүртетін, бірге іш ауырғанша күлетін, идеяларын мұқият тыңдайтын, бірге болашаққа жоспарлар құратын адам ауадай қажет. өмірің сонда айқын жарқын түстерге боялып, әп сәтте жайнап шыға келеді. аулада күз мықтап тұрып өз позицияларына орналасып жатса, менің көңіліме көктем жайнап келіп қоныстануда. көктемнің жұпар иісі, қоңыр самал желі, ыстық құщақтары басымды әбден айналдырып, жүрегімнің төрінен өз орнын алды. осы көктем бітпесін, жалғаса берсін деп қана тілеймін. маған біткен қос қанат тек көкке самғай берсін, құшырлана бауырыма қысқым келетін жандар осы жолда менің жанымнан табыла берсін деймін. махаббат, қызыққа толы жылдарымыз мол болсын деп тілеймін.